Foto: Toby Mellvile/Reuters

Mančester junajted je u okviru 17. kola Premijer lige Engleske na “Old Trafordu” pobijedio Aston Vilu rezultatom 2:1.

Nisu “Crveni đavoli” imali toliku terensku inicijativu u prvom poluvremenu, ali su bili konkretniji protivnik, što govori i odnos u šutevima nakon prvih 45 minuta 11:4 u korist Mančestera, međutim ni to nije mjerodavno sa obzirom da su samo četiri ukupno išla u okvir gola.

Obje ekipe imale su po jednu pravu priliku u prvom dijelu, a domaći su srećni da su oni svoju pretvorili u pogodak i na odmor otišli sa vođstvom.

Najprije je Aston Vila bila ta koja je došla do prilike. Džon Mekgin je došao do lopte u kaznenom prostoru, fino je prihvatio i snažno šutirao, ali je David de Hea refleksno reagovao i spasio svoj gol.

Mančester junajted pogodak je postigao u 40. minuti preko Entonija Marsijala. Akciji je prethodila gužva na sredini terena gdje se najbolje snašao Pol Pogba i proslijedio loptu do Markusa Rašforda koji je petom uposlio Arona van Bisaku. Desni bek domaćih dobro je probio po strani u uputio upotrebljiv centaršut koji Marsijal završava na najbolji mogući način i dovodi Mančester u prednost.

Bolje je Aston Vila otvorila drugo poluvrijeme što je i pokazala prilika za Olija Votkinsa u 52. minuti kada je De Hea još jednom sjajno reagovao i spriječio gotovo siguran pogodak.

Ipak, ono što se nije desilo u 52. minuti jeste u 58. minuti. Brzo su izveli “Lavovi” jedan prekid na sredini terena, lopta je stigla do Džeka Griliša koji ju je ubacio u kazneni prostor gdje se najbolje snašao Bertrand Traore i poravnao na 1:1.

Samo tri minute trajao je neriješen rezultat i Mančester je ponovo poveo. Daglas Kruz je bio neoprezan u svom kaznenom prostoru i oborio Pogbu, a Majkl Oliver pokazao na bijelu tačku. Odgovornost je preuzeo Bruno Fernandeš i pogodio za novo vođstvo “Crvenih đavola“.

Mogao je Marsijal dodatno povećati prednost u 71. minuti, no tada je Francuza sjajno zaustavio Emilijano Martinez. Malo je nedostajalo da u sljedećem napadu dođe kazna za to, no De Hea zaustavlja pokušaja Anvara El-Gazija.

Pokušavali su “Lavovi” do kraja da stignu barem do jednog boda, i mogli su u 84. minuti preko Tajlora Mingsa, ali je šutirao glavom preko gola i na semaforu je do kraja ostalo 2:1, sa obzirom da je Španac na golu Junajteda zaustavljao sve pokušaje gostiju.

Mančester junajted u sljedećem kolu gostuje Barnliju, dok Aston Vila dočekuje Totenhem.

Standings provided by SofaScore LiveScore

OSTAVITI ODGOVOR

Molimo unesite komentar!
Ovdje unesite svoje ime