(VIDEO) Klopova mašinerija protutanjala Vemblijem, Liverpul prvi finalista FA Kupa

Liverpul je finalista FA Kupa.

Možda i dvije najkonstantnije i najbolje ekipe trenutno na svijetu ukrstili su koplja u FA Kupu. Utakmica je počela ranim golom Liverpula. Endi Robertson je nabacio, a Ibrahima Konate bio je najviši u skoku i glavom je savladao Zakarija Štefena za 1:0.

U 17. minuti Štefen je napravio kardinalnu grešku. Na jedan povratni pas pokušao je da u stilu svog klupskog kolege i prvog golmana Sitija Edersona mirno predribla Sadija Manea koji ga je nadmudrio, uklizao mu i postigao tako pogodak.

Do kraja prvog dijela pokušavali su izabranici Pepa Gvardiole da bar dođu do smanjenja rezultata. Da stvar bude gora u finišu poluvremena Liverpul je postigao još jedan gol, a strijelac je ponovo bio Mane iz voleja.

Štefen
Foto: Reuters/Carl Recine

Nadu “Građanima” samo dva minuta u nastavku golom vratio je Džek Griliš. Uspjeli su se igrači Liverpula vrlo brzo oporaviti od početnog šoka i ponovo su uspostavili kontrolu nad utakmicom.

Ogromnu priliku imao je Gabrijel Žezus u 70. minuti kada je izletio jedan na jedan sa golmanom Liverpula Alisonom koji se bacio kao mačka i zaustavio nogi gol Sitija.

U 90. minuti Rijad Marez probio je po desnoj strani i šutirao, a lopta se odbila do Bernarda Silve koji je smanjio na 3:2. Za nešto više ostalo je premalo vremena i Liverpul je uspio da se plasira u finale.

U finalu FA Kupa Liverpul će igrati protiv boljeg iz meča Čelsi – Kristal Palas. Ta utakmica na programu je sutra sa početkom od 17:30h.

Postavi odgovor