Foto: REUTERS/Adam Davy

Sautempton je u okviru šesnaestine finala FA kupa pobijedio Arsenal rezultatom 1:0. Jedini pogodak na utakmici nesrećno je postigao štoper “Tobdžija” Gabrijel Magalhaes poslavši loptu u sopstvenu mrežu.

Iako je Arsenal bio taj koji je imao veći posjed lopte i terensku inicijativu, Sautempton je na kraju slavio. Imali su “Sveci” nekoliko dobrih situacija, naročito u prvom poluvremenu, kada su i postigli jedini gol.

Če Adams je prvi mogao dovesti svoj tim u prednost u 15. minuti, međutim dobro se ispriječio Bernd Leno. Nije međutim golman Arsenala mogao ništa kada je u 24. minuti Kajl Volker-Piters centrirao, a Gabrijel Magalhaes skrenuo loptu u sopstvenu mrežu za prednost Sautemptona 1:0.

Imao je Arsenal prilika u drugom dijelu da dođe do izjednačenja, međutim to im nije uspjelo. Najprije je u 68. minuti Edvard Nketijah prošao nekoliko igrača i šutirao, ali je Ben Forster bio na visini zadatka. Već u sljedećem napadu, gosti su možda ostali uskraćeni i za jedanaesterac, pošto je Volker-Piters igrao rukom u svom šesnaestercu, no Piter Benks se nije oglasio, a pošto VAR-a nema, nije mogao provjeriti sporni detalj.

Sautempton je ovom pobjedom osigurao plasman u osminu finala FA kupa gdje će igrati protiv Vulverhemptona.

OSTAVITI ODGOVOR

Molimo unesite komentar!
Ovdje unesite svoje ime