Foto: david Klein/Reuters

Danas su se igrale utakmice 11. kola engleske Premijer lige. Čelsi je na “Stamford Bridžu” odigrao neriješeno 1:1 sa Barnlijem, dok je Kristal Palas bio bolji od Vulverhemptona sa 2:0.

Fudbaleri Čelsija dočekali su ekipu Barnlija i od samog početka nametnuli jak ritam koji je rezultirao brojnim prilikama za gol. Prvi je priprijetio Kalum Hadson-Odoi u petom minutu susreta kada je sam izašao pred Nika Poupa, ali je ovaj bio dobro postavljen.

Popu je bio spasilac Barnlija i u desetom minutu utakmice kada je glavom šutirao Žoržinjo nakon centaršuta iz kornera. Ros Barkli je lijepo šutirao u 14. minutu, ali je lopta završila pokraj lijeve stative.

Prvu priliku na utakmici Barnli je imao u 21. minutu kada je odbijenu loptu pokupio Maksvel Korne i zagrijao dlanove Eduarda Mendija.

Nakon što je u 29. minutu u situaciji jedan na jedan sa Poupom Ris Džejms bio nedovoljno pribrana, četiri minuta kasnije Kai Haverc je glavom zatresao mrežu gostiju nakon lijepog centaršuta Džejmsa.

I u nastavku utakmice Čelsi je bio ekipa koja se sve pitala na terenu, a prva ozbiljna prilika došla je već u 50. minutu kada je Tijago Silva šutirao glavom, ali je pogodio stativu. Tri minuta kasnije iz veoma dobre pozicije loptu je preko prečke poslao Haverc tako da promjene rezultata nije bilo.

Nakon mnogo propuštenih prilika koje je pratio i posjed lopte, ali i lijepa igra, Čelsi je u 80. minutu kažnjen kada je Matej Vidra nakon lijepe timske akcije uguravši loptu u gol iz neposredne blizine zaledio “Stamford Bridž“.

Pritisnuo je Čelsi u posljednjih desetak minuta s namjerom da stigne do trijumfa, ali promjene rezultata nije bilo te je Barnli iz Londona otišao sa velikim bodom u džepu.

Čelsi će u narednom kolu gostovati kod ekipe Lestera, dok će Barnli biti domaćin Kristal Palasu.

Kristal Palas je bio domaćin ekipi Vulverhemptona i uspio je da stigne do pobjede sa 2:0, a oba gola viđena su u drugom poluvremenu, iako su i u prvom dijelu obje ekipe imale svoje šanse.

Prvi pogodak viđen je u 61. minutu kada je nakon genijalnog dodavanja Džejmsa Mekartura pogodio Vilfred Zaha za veliku radost domaćih navijača.

Konačnih 2:0 postavio je Konor Galager u 78. minutu uz pomoć jednog gostujućeg igrača koji nije uspio da se postavi na pravi način.

Kristal Palas će u narednom kolu biti domaćin Barnliju, a Vulverhempton će bodove tražiti kod kuće protiv Vest Hema.

Norvič je u gostima bio bolji od Brentforda sa 2:1. Pogotke za pobjednički tim postigli su Matijas Norman u šestom i Temu Puki u 29. minutu. Utješni gol za Brentford djelo je Rika Henrija u 60. minutu.

Standings provided by SofaScore LiveScore

OSTAVITI ODGOVOR

Molimo unesite komentar!
Ovdje unesite svoje ime