Mančester junajted u izmijenjenom sastavu prošao Luton, Brentford izbacio VBA nakon penala

Large
Official photo

Večeras su odigrane četiri utakmice Liga kupa Engleske. Votford je iznenađujuće ispao od četvorligaša Njuporta, Brentford je nakon boljeg izvođenja jedanaesteraca izbacio VBA, Vest Hem bez većih problema eliminisao Hal siti, dok je Mančester junajted prošao drugoligaša Luton.

Imali su “crveni đavoli” terensku inicijativu svih 90 minuta utakmice, ali u prvom poluvremenu nisu stvarali prilike iz kojih bi ugrozili gol Džejmsa Šeja. Huan Mata bio je najzapaženiji igrač Mančestera u prvih 45 minuta. Imao je upravo Španac priliku u 13. minuti kada je njegov volej udarac uspješno odbranio golman Lutona. Pred sam kraj prvog poluvremena neoprezan je bio Džordž Monkur i faulirao Brendona Vilijamsa u svom šesnaestercu. Siguran izvođač najstrožije kazne bio je Mata i Mančester je na odmor otišao sa golom prednosti.

U drugom poluvremenu slična slika na terenu. Mogao je Mančester postići pogodak u 63. minuti, ali Džesi Lingard nije iskoristio dobru priliku. Imao je Lingard još izglednih situacija, ali se rezultat nije mijenjao. Mogao je Luton iznenaditi Junajted kada je Tom Lokjer dobro šutirao nakon centaršuta, ali Din Henderson dobro brani njegov udarac. U 88. minuti za 2:0 pogodio je Markus Rašford nakon asistencije Mejsona Grinvuda, koji u sudijskoj nadoknadi postavlja konačnih 3:0 za “crvene đavole”.

Preostale tri utakmice Liga kupa:

Njuport – Votford 3:1
Vest Bromvič albion – Brentford 2:2 (4:5 nakon penala)
Vest Hem – Hal siti 3:1

Postavi odgovor